أدري اني قاسي وظالم..

احبك كثر ماطارت تحت شمس الزمان طيور=احبك كثر ماشال السحاب الماء وفرط به
احبك كثر ماضاقت من اسباب الفراق صدور= احبك كثر مامرت على شفاه البشر كذبه
احبك كثر مايمسي يتيم وخاطره مكسور=احبك كثر مافـ الناس .. ناس ظروفها صعبه
احبك كثر ماتنقال هالكلمه بدون شعور=احبك كثر ماتطري بنفس الآدمي رغبه
احبك كثر ماضاق المكان بواحد ٍ مقهور= احبك كثر مافي دنية البحار من غربه
احبك كثر مايجلس على كتف الشجر عصفور=احبك كثر مايشتاق حضن .. لحضن من حبـّه
احبك كثر ماضاعت حروف ٍ في حكي مبهور=احبك كثر ماتعبث يدين الطفل باللعبه
احبك كثر ماردد حكيم .. ان الزمان يدور=احبك كلمة ٍ لك قالها صادق .. ومن قلبه
احبك وادري اني قاسي وظالم .. غريب الطور=بلحظه ممكن اقلبها على راسك بلا سبه
اغيب وكني الفرقا واصد وكن مالك دور= اناني لحظة عنادي ولاتنفع معي طلبه
اعود ّ لك وانا خجلان شايل شوقي المغرور=القى احلى ابتسامه تنتظر بشفاتك العذبه
عتابك لي بلحظات الغضب والنرفزه ..( مشكور )=الا ياسعـْد من مثلي رماك الحظ في دربه
اقول آسف .. تقول اسكت .. ومثلك لاخطا معذور= وتغرقني بعطفك لين ينسى خافقي ذنبه
بعد هذا حروفي لو تبي تكتبك صارت نور= وانا فيك القصيد القاه .. يابعده وياقربه
لكن ذي وثيقة حب ..أسطـّرها وانا مجبور= أبثبت لك حقوقك في خفوق ٍ مشغله ربه
احبك واعترف لو في يدي مابدّلك بالحور=في عمري لقيتك طير غرد سابق ٍ سربه
احبك كثر ماطارت تحت شمس الزمان طيور=احبك كثر ماشال السحاب الماء وفرط به